怨婦遊婚展

2012 年 3 月 11 日, 星期日



廁紙如常的 Sunday Off
草紙如常的星期日秘撈

平時, 廁紙通常都是獨自留在家
享受沒有人打擾的星期日下午
上網也好, 打 Blog 也好
總之, 就是做一 D 做完都唔知做左 D 咩咁囉
 
當然, 有時都會獨個兒去逛街
始終, Shopping 我還是喜歡自己一個人
想去邊就去邊, 想睇幾耐就睇幾耐
我行我素, 我的性格

2012 年 3 月 11 日
這一天, 比較特別
除了是 311 一週年
亦是廁紙的第一次去婚紗展
廁紙獨個兒去婚紗展

前一晚
廁紙跟草紙提到
我明天要一個人去婚紗展

草紙, 當時的反應是 " 去婚紗展做咩 "
大概, 草紙心裡應該這麼想
" 我無話娶你啫, 你唔係咁樣迫婚呀嘛 "

我認, 我經常都問草紙 " 你幾時娶我 "
跟著, 我又會問 " 你唔娶我, 咁不如我娶你, 你嫁俾我, 跟我姓丫 "
有人跟著會話 " 我又無話唔娶你, 做咩你係都要我嫁俾你啫 "

這樣的對答, 幾乎每過幾天就會重複一次
不過, 算啦
一日買唔到樓, 應該, 都嫁杏無期

我跟草紙聲明
我去婚紗展, 是因為我要去買聖安娜餅卡

七折呀, 七折呀
朋友用員工價才可以買得七折的美心, 東海堂
婚紗展竟然有七折的聖安娜, 當然要買啦

我, 好喜歡, 好喜歡聖安娜的 55 度古古力蛋糕呀嘛
換一個蛋糕, 就要三張幾
七折, 當然要買啦
可知道, 信用卡也不過是八五折
而更可惜的是, 紅豆古古力單件裝經已停產

草紙聽罷 " 你聽日去婚紗展記得化妝喎 "
廁紙聽得一頭霧水
草紙 " 你唔化行個妝, 人地以為你個怨婦嫁唔出, 去婚紗展扮有人娶呀 "


我......
無人要咪無人要囉, 無人娶咪無人娶囉
嫁唔出咪嫁唔出囉


我又唔係養唔起自己


我, 掹車邊都算典型三高港女丫
我, 洗唔洗做怨婦, 去婚紗展扮有人娶呀
xXyz......

我, 雖然不是怨婦
不過, 我在婚紗展的確有扮有人娶囉

一場到來, 又花了十元還是廿元買入場劵
當然不是買完餅卡就算啦

我, 去打聽下, 八卦下
結婚要用三十萬, 係點樣倒出去嘛
結論是, 我唔捨得囉

亦有人曾經講過
如果, 是如果
佢娶我, 會同我去日本影婚紗相

廁紙, 唯有扮有人娶, 去打聽一下去日本影婚紗相的價錢
最平的, 萬多元, 就有交易
二萬幾, 三萬幾的, 都有

廁紙, 看上三萬幾的那一家
好靚, 好靚
最重要是, 攝影師解釋得到廁紙對色溫, 調色的疑問
如果, 成果有 Display 的質素
絕對貴得有道理

當然, 如果對什麼色溫, 調色都無要求的
萬多元的, 其實都已經不錯
絕對是負擔得起的價錢

本來, 廁紙就主將結婚唔擺酒
婚紗展過後, 我更加覺得
與其花三十萬去換一晚的回憶
我, 我情願去日本影一輯靚靚的婚紗相
再加好多好多次的日本自助遊囉

娶我, 絕對不用三十萬
不過, 唔知幾時先嫁得出呢