2010 年 7 月 24 日, 星期六
又係一星期一次嘅迪士尼
熱辣辣, 又曬, 又行雷
點解都仲要去
又唔係未去過, 都去左 N 次啦
就係為左佢個 " 迪士尼好友驚喜快拍 "
由六月開始到依家
為左同 D 少會出現嘅卡通人物影相
熱到死, 落大雨都入迪士尼
又曬又熱都算啦
但係今日, 為左呢個 " 迪士尼好友驚喜快拍 "
我真係嬲到爆
亦對香港迪士尼樂園徹底失望
講返平時在迪士尼同卡通人物影相
一向都係排到你果時, 可以簽名, 又可以影 pose ( 即係單影公仔, 唔影自己 )
" 迪士尼好友驚喜快拍 " 初初推出果時
已經講明, 排到你, 唔可以影 pose, 要最後先有得影
都岩嘅, 個個排到自己都話影 pose
時間長左, 個卡通人物熱死啦
最後先影 pose, 人人圍埋一齊影, 一樣影到
呢個安排, 以我所見, 人人都接受喎
差唔多到最尾, 就會有一大堆人圍住等影 pose
至於簽名呢, 初初亦係可以一路影, 一路簽
直到六月的某一日, 我地再去迪士尼影 " 迪士尼好友驚喜快拍 "
職員話, 最新指引, 只可以影相, 唔可以簽名
理由係, 想俾多 D 客人影相
係, 唔簽名, 單影相, 係快左, 可以多 D 客人影
但係咪因為有人唔早 D 黎排隊, 又或者根本唔排隊, 影唔到相, 發顛, 發爛渣
( 呢 D 生番嘅野蠻行為每次都發生, 仲見過有職員俾人扯爛制服同名牌 )
迪士尼為左應付呢班唔守遊戲規則, 仲發顛, 發爛渣的人
就要抹殺其他有排隊, 守規矩的客人的權利, 唔俾簽名
當日佢話唔俾簽名, 我都好嬲囉
大佬, 我特登入黎就係想簽名, 你依家話唔得, 仲要理由係想俾多 D 人影相
一係你一開始推出呢個 " 迪士尼好友驚喜快拍 " 就話唔俾簽, 咁我條氣都順 D 丫
想影相, 咪早 D 黎排隊囉
人地唔早 D 黎排, 又或者根本唔排
都無理由改變自己的遊戲規則, 變相等於加長時間去遷就佢地啫
嬲嬲地, 咪走去大會堂反映囉
你真係唔可以為左避免有人影唔到相發顛, 發爛渣
就剝削其他人, 我都有俾錢買入場劵架
影相時間多左, 都一樣可以有人影唔到而發顛, 發爛渣投訴架
唔俾簽名之後, 都無心機再去迪士尼啦
到下一次去, " 迪士尼好友驚喜快拍 " 又可以簽返名喎
理由係, 因為好多人反映無得簽名好失望喎
咁即係唔係只係我一個唔滿意啦
都算迪士尼有返 D 良心
好啦, 到今日再入去
一心睇下會唔會有阿拉丁
因為好多都已經影左, 簽左名, 只係未遇過我最想見嘅阿拉丁
去左咁多次, 終於俾我遇到啦
影完相, 簽完名, 咪企埋一邊等最後影 pose 囉
到最後, 又因為有生番唔排隊, 企圖夾硬攝位影相
職員為左唔俾生番得逞, 漠視一班已經紮行馬等影 pose 的人群, 不設影 pose
我, 真係火都黎埋
不過, 斯文人係唔會同職員嘈嘅
大佬, 你地迪士尼又話要玩什麼 Magic, 唔肯講幾時會有咩卡通人物出現
我都黎過好多次啦, 難得我今日遇到, 你竟然唔俾我影, 有無攪錯
我無打尖, 又無攝位, 我同其他人一樣紮行馬等影 pose 啫
做咩又因為一 D 唔守規矩的客人而抹殺我同其他有守規矩的客人的權利
就算你叫我下次黎影過, 我可能黎多十次八次都撞唔返阿拉丁架嘛
火滾, 咪即刻去大會堂囉
我好聲好氣架, 第一句就問佢, 迪士尼係咪唔準影 pose
心諗, 你講一句係, 我無野好講
姐姐自己都唔敢答我
姐姐入去問完, 話可能係同事處理得唔好, 所以無影到 pose, 其實係可以影嘅
但我都重申, 我唔係要投訴你的職員, 你的職員無問題喎
只係你地迪士尼唔可以一次又一次
因為一 D 唔守規矩的客人而抹殺我同其他有守規矩的客人的權利
我今次同佢講明, 我希望你地即刻有改善囉
今次迪士尼真係做到呀, 下一場可以影返 pose
我好欣賞迪士尼的效率
但係有時, 錯左就係錯左
事後補償, 點都係遺憾, 當然, 好過咩都唔做啦
一次又一次嘅不愉快經歷
仲要係, 自己無錯, 依足規矩
只因其他人的橫蠻無理, 而令自己的權益被剝削
再加上平時排隊俾人打尖, 職員又唔理
口口聲聲叫人要一齊排隊, 樂園指南都有寫架
有人一個排, 跟住十個八個攝入黎, 職員咪又當睇唔到
再唔係, 果 D 咩野 " 和打鞋子齌錢 man " 就係咁攝向前
都唔知係真定假, 職員一樣唔會去求証
我明白, 前線職員都好難做, 去捉人打尖, 攝位, 實俾客投訴
迪士尼係咪應該改善下打尖, 攝位呢個問題呢
下下息事寧人, 變相縱容班橫蠻無理的人
我就真係對迪士尼好失望囉
個 Annual Pass 到期, 都真係要慎重考慮仲續唔續
沒有留言:
張貼留言