講大話的一週

2012 年 6 月 23 日, 星期六, 端午節



廁紙一連八天的年假, 來到尾聲啦
這個假期, 本來, 我有個 To Do List
最起碼的, 就是要完成我的 2012 東北之旅 Blog
還有那些要寫又未寫的陳年舊 Blog
因為, 這個假期之後, 我又要半工讀啦
到時, 未寫的 Blog, 就更加無時間無心情寫啦

舊 Blog 未完, 都好想打尖
先記低這一週的大話日記

事緣, 這個假期
廁紙會跟草紙去一轉澳門兩日一夜
為免有人咦咦哦哦點解唔同埋佢去
為免有人俾說話我聽
為免有人買埋杏仁餅俾佢都彈三彈四
為免廁紙媽草紙媽私交之下洩漏風聲
廁紙草紙一致決定, 講大話

這麼大個人, 已經三十歲
唔返屋企睡, 都還得向阿媽交代

同事說, 草紙都說
" 咁大個人, 你係知會佢, 唔係要得佢同意 "
係...... 我知, 我明
但是, 我不想因為 " Inform " 和 " Approve " 而跟佢爭論囉
到頭來, 我還不是抵受不了我媽的陰波功
倒不如用最簡單, 最直接的大話
就是 " 我返夜 " 囉

一連八天的假期, 但中間有兩日 " 返夜 "
廁紙媽一定覺得奇怪
唯有, 做戲做全套, 講大話講到尾



*          *          *          *          *



星期一, 講大話的第一天
上班時間, 早上十時

廁紙一向的彈性上班時間
讓我可以遲過廁紙爸媽出門, 但又早過他們回家
有無返工, 我自己至知

扮返工的關係
在家吃完外賣, 也得清理現場
垃圾, 要掉出屋外的垃圾房

又因為扮返工的關係
要掉件衫出來洗
我又未至於敗家到在衣櫃拿件乾淨衫出來洗
就在那些新買, 未穿過又未洗過的隨便掉一件出來囉

同日晚上, 廁紙媽歸來之時
隨口問過一句, " 咁早返嘅 "
我, 差點穿崩
還好, 還清醒, 懂得答 " 家下七點幾啦喎 "



*          *          *          *          *



星期二, 講大話的第二天
是日, 放假

因為星期三四要 " 返夜 " 的關係
這一天放假, 不出為奇
所以, 這一天, 懶得講大話

一如以往, 在家虛渡光陰
也準備一下明天 " 返夜 " 的行裝



*          *          *          *          *







星期三, 講大話的第三天

是日, 返夜

正常的返夜, 廁紙都是白天在家, 晚上才返工
所以廁紙這個早上在家, 又不出為奇, 輕易過關

至於在澳門的兩日一夜, 容後再 Blog



*          *          *          *          *











星期四, 講大話的第四天


是日, 返夜後的放假天

正常, 廁紙返夜後的放假天
一, 就是在家痴呆
二, 就是出去玩
所以, 這一晚我晚上才回家, 又正常嘛

這一晚, 不知廁紙媽是因為忘記而隨口問, 還是有心 " 裝 " 我
問 " 你今日又放假咩 "
我 " 我昨晚返完夜丫嘛 "
媽 " 係喎, 咁草紙又放假咩 "
我 " 佢今日返半日丫嘛 "


還好, 草紙一向都有間中返半日的時候
雖然我相信, 廁紙媽應該可能跟草紙媽私交過

這一晚, 我一時大意, 自言自語說
" 明天去邊好呢 "
廁紙媽問 " 你明天唔洗返工咩 "
差點又穿崩, 急忙補答
" 係喎, 明天星期五, 我以為明天星期六, 星期六我放假丫嘛 "



*          *          *          *          *



星期五, 講大話的第五天
上班時間, 又是早上十時

再一次廁紙爸媽出門, 我還可以繼續睡覺
不過, 為免穿崩
也因為我想出街敗家
這一晚, 我晚上十時多才回家
又輕鬆過關



*          *          *          *          *



一連五天的講大話, 扮返工, 完滿結束

原來, 扮返工, 比真返工也好不了幾多

時刻清醒, 免得隨時穿崩

廁紙草紙亦經常戲言
" 你咁樣呃你阿媽, 因住第日個女都咁樣呃你 "
" 咁咪唔好生女囉 "
" 咁生仔囉 "
" 生著個仔好似你咁咪一樣衰 "

有時我會想
如果父母哦少 D, 問少 D, 理少 D
我, 應該不會刻意去講大話
凡事, 都是雙向的嘛