草紙, 廁紙一齊三年有多
草紙, 作為男朋友
雖唔係各方面都做到一百分
不過, 對我, 的確好好
單係無脾氣, EQ 高, 呢一點, 已經難能可貴
對住我這個野蠻女友, 雖不至於會出手掌摑男友
但總會時常無緣無故, 為點點雞毛蒜皮的事而黑面, 發脾氣
廁紙放假的日子, 由其嚴重
得閒無事, 喜歡想當年嘛
舊事重提, 給你找麻煩
草紙都直言 " 你放假, 我頭痕 "
不過, 你對我, 依然不離不棄
應該就係, 一個願打, 一個願捱吧
我知, 能夠找到你, 我三生有幸
草紙, 的確係廁紙爭取得來的
雖不至於完完全全的女追男
不過, 我依然為我有努力過的女追男而自豪
今時今日, 女追男, 有咩問題
雖然, 有人話 " 女係等仔溝, 唔係要黎溝仔, 咁先矜貴 "
雖然, 曾幾何時, 我亦因為呢句說話而耿耿於懷
不過, 如果當日我無努力過, 今日我可能仲食緊白果
邊得今日你愛我多過我愛你呀
今時今日, 你都間唔時會埋怨話, 你愛我多過我愛你
咁你咪當呢個係當日你無做主動的代價囉
你對我好, 我知架
我成日向你發脾氣, 我都有少少內疚架, 有時
為左對你有返少少補償
呢一日, 好眼訓, 都生長水遠黎湊你放工
雖然, 你都係唔多願意係公司附近拖我
( 上次你又係唔願拖, 行到九丈遠先拖, 一拖就俾你同事撞到正, 你個尷尬樣, 好好笑 )
雖然, 你唔認, 不過, 我明嘅
見你行到彈下彈下咁, 我就知你真係好開心
有人湊放工, 真係好開心架, 不過你又真係好耐都無湊過我放工啦
我明嘅, 我放工, 你都未放工丫嘛
我同你講
" 你呢排做野辛苦, 我請你食意大利餐, 我黎接你放工丫 "
一啖砂糖, 一啖屎, 為我將來的無啦啦發脾氣做定準備
我的小姐脾氣, 改唔到架啦, 都俾你竉壞晒, 燶到成舊炭囉
你唯有望我多 D 良心發現啦
帶你去朋友推介的一家樓上餐廳
La Cucina
驚死自己講錯, 又驚死侍應聽錯
前一日再打電話去 confirm booking
影響我下半生的幸福喎, 不容有失
環境幾好, 好有樓上私房菜的感覺
好彩選係星期三去, 無咩人, 夠晒靜, 湊仔湊女一流
餐廳不提供免費水, 一支蒸餾水或者有氣水都要 $38
不如要汽水
餐前小吃, 蒜蓉飽, 蕃茄多士
味道都比較濃, 不過, 我喜歡
Grissini
我本身好中意食 Pama Ham, 所以都好中意呢個
不過 $98 得六件, 有 D 貴
如果要食 Pama Ham, 去 The Grill 仲抵, 任食
埋單計, 就當然 The Grill 貴幾倍啦
但係仲有其他野食架嘛
仲要食埋環境氣氛呢, Poolside BBQ 喎
食到氹到個女朋友返黎, 咩都抵返啦
特式芝士菠菜餡角配肉醬
味道我就覺得一般啦
不過你中意, 我滿意
磨菇汁牛扒
普普通通
食牛扒, 都係配 A1 Source 好 D
比較喜歡 Outback , 抵食夾大件
食飽飽, 有人提議去搭船, 再轉巴士
我話, " 好遠喎 "
有人話, " 咁我想你倍我一齊行, 得唔得 "
得, 想當日
有人話要去嘟兩蚊, 我以為你真係想慳果兩蚊
原來, 你只係想對多我一陣得一陣
咁又係, 要慳, 就唔會同我去食成千銀的燭光晚餐啦, 死蠢
草紙話, 將來灣仔碼頭會唔同晒, 所以要影低佢
咁你今日堅持要搭船, 係咪就係想回味下你當日點樣昆我由金鐘行去中環搭船呢
咁搭船, 又真係浪漫過搭地鐵嘅
咁搭巴士一齊坐, 又真係 Sweet 過搭地鐵一齊企嘅
事實又一次証明
女, 唔係一定要等仔追, 等仔冧
間唔時的女冧仔, 的確會氹得對方心歡喜
為左自己的終身事業, 努力! 努力!
幸福生活原是平淡過, 難得朝夕都有你深愛我
