Pillow Talk 之婚事

2013 年 8 月 3 日, 星期六



自從知道跟廁紙媽越說得多婚禮的事越麻煩
我已經不會再主動跟廁紙媽提起婚禮
即使已經決定好的事, 都盡量 Last Minute 才跟媽說
免得自找麻煩

有時候會覺得
在家住的日子, 還有不到 150 日
廁紙媽要煩我, 都只是剩餘 14x 日
算啦, 忍吧

奈何, 一想到跟廁紙媽對婚事的看法不一樣
有人繼而干涉至我要跟從她的做法
又想到, 早前廁紙媽冤枉我無跟她商量大婚日子而吵
還是, 守口如瓶吧

過大禮的日子
縱使我早有心水
縱使廁紙爸三番四次問起
我都不答
免得他們某天失憶之時, 又冤枉我自把自為決定過大禮日子

這一晚的 Pillow Talk
廁紙媽又說起過大禮

我說 " 嘻! 唔好問我, 你地自己諗, 諗完話我知, 唔好到時又話我自把自為, 雖然我有心水, 我都唔會話你知, 你地自己諗 "
廁紙媽又懶大方說 " 嘻, 你選左邊日咪邊日囉, 無所謂啦 "
我再重申 " 唔好, 你地決定, 唔好問我, 費事又俾人屈我自把自為 "

最後, 我都無說出確實日期
只提到, 是新曆十一月, 農曆十月的某星期日
( 廁紙媽說過要避開農曆九月 )
這個月的過大禮吉日, 通勝上就得一日適合

出 Blog 前幾天
廁紙爸又問起過大禮日子
唉, 幾乎每個月都問一兩次

我答 " 唔知呀, 你地決定啦, 唔好問我啦 "
爸 " 過大禮男家話事架嘛, 邊係我地女家話事 "
我 " 咁人地男家唔理, 我都無辦法架 "
爸, 無言

心想, 你如此著緊, 你自己問草紙, 叫廁紙媽問草紙媽就行嘛
不要給我找麻煩吧



*          *          *          *          *



廁紙爸三番四次提到的雙方家長見面
我說 " 我今日問過草紙啦, 草紙話草紙媽這兩個月都好忙, 唔得閒架 "
廁紙媽 " 係呀, 佢有工開嘛, 做到十月 "
廁紙 " 咁你同草紙媽傾店再話我地知啦, 唔好又話我唔安排呀 "
( 廁紙媽跟草紙媽因工作關係熟絡 )
廁紙 " 到時又食自助餐啦, 你決定好就早 D 話我知, 我去訂位啦 "

結論是
我不著緊的事情, 不要搶太多上身
又應該將部份責任推回長老
免得他們有天失憶之時, 又姓賴



*          *          *          *          *



說著, 說著
廁紙媽問 " 你都見過草紙弟女朋友, 你會唔會請佢黎飲呀 "
一向都知廁紙媽八卦, 但不是八到去管男家的事情吧

我答 " 要請都係男家名義請啦, 何況, 最終決定權係草紙弟, 唔係我同草紙去決定請唔請囉 "

或者, 在長輩的角度
請草紙弟女友去飲與否, 是禮貌的問題

但在我跟草紙的角度
請草紙弟女友去飲與否, 是身份地位認同的問題

記得朋友的婚禮上
叔仔女友, 死纏叔仔讓她出席婚禮
四個月後, 還不是分手

又記得幾年前
廁紙跟草紙剛一起一年多
因為草紙無帶過我去見他的家人
我覺得, 得不到身份的認同而哭過
還記得, 那天我在香港公園哭

又記得
有天, 草紙跟家人去尖沙咀食飯看煙花
( 記不起是什麼日子, 總之是維港放煙花的節日 )
草紙訛稱, 只訂了一圍, 無位容納我而不肯帶我去
後來, 我從草紙的相片得知, 草紙弟帶了當時的女朋友去
因此, 我不開心過

或者, 草紙比較慢熱
又或者, 草紙的戀愛經歷讓他比較謹慎
又或者, 當年我還未夠班

Anyway, 等了兩年多三年
( 記不得幾多年啦 )
到我終於獲邀, 出席草紙家聚會
忽然, 我又覺得, 不去好過去
我不用去, 都未嘗不是一件好事

六年多後的今日
我, 終於守得雲開
即將嫁入草紙家啦
當日那位有份上座的草紙弟女朋友
今日, 已經不知去向了

經歷過
哭過
不開心過
有得出席與否, 這份身份的認同
還是留待當事人自己去決定吧