我都有金收

2013 年 8 月 3 日, 星期六



難得跟草紙吃早餐
看早場 " 怪獸大學 "

吃早餐時
草紙失機無神說起

問, " 傳統上, 我地結婚, 家人要送金飾俾我地, 你想要咩呀? "
我 " 下? 你之前唔係答左要獎金咩, 仲送金俾我? "
草紙 " 我有講過咩? "
我 " 係呀, 你七舅母問你要獎金定金飾, 你無問我就話要獎金丫嘛 "
草紙一臉茫然 " 係咩? 唔記得, 咁依家係大舅父問啦 "
我 " 隨佢地中意啦 "
草紙 " 依家我問你, 你又唔答 "

我 " 家下 D 金好貴, 一隻介指仔都要千幾蚊, 你地又唔係李嘉誠, 千幾蚊, 夠人地買好多餐送架啦 "
    " 何況我係人地個女, 唔係你地屋企人個姪女, 我預左咩都無架 "

草紙 " 大舅父問, 送金鐲俾你好唔好, 如果大舅母仲係到, 都可能有一對, 但依家得一隻, 你 O 唔 OK, 我知送鐲應該一對架嘛 "
我 " 一隻金鐲都好貴喎, 最輕兩錢都三千幾啦 "
草紙 " 我驚你介意一隻丫嘛 "
我 " 由始至終, 我都唔希望我地結婚係人地嘅負擔, 所以先會話我地俾錢買對金鐲, 用你媽名義送之嘛 "
     " 唔係你阿媽都仲買呀嘛, 佢記唔記得我地買左對鐲架 "
草紙 " 唔知佢記唔記得喎, 我再提下佢啦 "
我 " 我自己都買左, 夠戴架啦, 所以仲有無得收都無所謂 "
草紙 " 你識咁諗就得啦 "
我 " 你知我係好老婆呢 "
草紙 " ...... "

我 " 佢地買咩都好啦, 總之唔好買耳環, 我已經有啦, 買多對都戴唔到 "
草紙 " 哦 "
我 " 如果可以的話, 最好係周生生, 周大福買啦, 有我媽當年賣金的經驗, 我對細行無信心 同等金價, 唔好慳果少少啦 "
草紙 " 下, 呢樣野我控制唔到喎 "
我 " 你有辦法嘅 "

一直都覺得
無金收是正常, 有金收是 Bonus
一早就預了無金收, 失機無神, 我都可能有金收
雖然一日未到 Big Day 都不知真偽
不過知道草紙家人的一番心意
就算真的沒有
都心足