80 後上車 - 睇樓 Do's & Don't's

2015 年 1 月 9 日, 星期五



最近草紙經常揶揄
嫁, 你又嫁左
樓, 你又買左
巴閉啦你
好多人恨都恨唔到架

巴閉, 倒不覺得有幾巴閉
自豪, 倒是有點點

2013 年結婚
花的一分一毫
靠自己

2014 年買樓
花的一分一毫
亦都是靠自己

2015 年裝修
花的一分一毫
亦都努力 Budget Control
期望繼續靠自己

結婚, 買樓, 裝修
都沒有期望, 奢望過會有人幫
自我感覺良好, 自豪的同時
常在咀邊的是
" 我今日所擁有的一切, 都因我昔日的付出比你多 "



*          *          *



前文提到
廁紙買樓後, 都不敢跟家人提半句
莫說經濟上的幫忙
睇樓, 買樓的一點一滴, 都是靠自己

慶幸自己走運
又慶幸身邊太多正職是包租公 / 包租婆的同事教路
造就廁紙成功上車

80 後上車靠自己
說不上有什麼攻略
小小經驗分享
希望幫到同是零經驗, 準備上車的你



*          *          * 



(1) 不要怕麻煩, 多找幾個 Agent

多去幾間不同的地產公司, 包括大行和細行
即使同一間公司, 都多去幾間不同的分行
實行魚翁撒網, 識多幾個 Agent

要知道
同一個樓盤
落在不同的 Agent 手上
結果可能大不同 

只要, 簽睇樓紙, 正式買樓, 都用同一間公司就可以了
同一間公司的不同 Agent, 倒無問題啊

廁紙這次買樓嘛
本來就由某公司的甲 Agent 帶我睇的
睇完了嘛, 就一直沒下文
機緣巧合, 廁紙自己又努力之下
由同公司的乙 Agent 帶我去睇第二次
結果, 當晚就成交了

Agent 嘛, 人夾人
亦當然, 有 Agent 勤力進取, 亦有 Agent 但求不勞而獲
要成功上車, 看緣份, 亦要自己找對 Agent 啊

這兩三年睇樓以來, 接觸過 N 個 Agent
By Experience, 最好還是找中年 Agent 

你說我偏見又好, 自身經驗都好
時下的 " 靚 " 仔 Agent
咦得唔洗做, 有客埋黎就俾錢
又可能, 佢地抵唔得被業主鬧 / 受辱
佢地, 未必幫到你

試過好多次
我合理還價
" 靚 " 仔 Agent 想也不想就即答
" X 小姐, 緊係唔得啦, 岩岩賣左果間咩咩咩, 都幾多幾多啦, 你呢個價無可能囉 "
" X 小姐, 前幾日隔離座先賣左幾多幾多, 我做架, 呢個價, 業主一定無得傾囉 "
" 佔中都無影響啦, 岩岩又幾多幾多成交啦, 你再等無架啦 "

到底是業主無得傾
還是 " 靚 " 仔 Agent 不肯幫我去傾呢

要是真有這麼多成交, 你又剛剛做成買賣
我估你都應該不會花時間應酬我這個死窮鬼吧

中年 Agent 嘛, 相對明事理
亦肯幫客 Bargain
By Experience, 真的未試過第一句就被 Turn Down

業主肯唔肯減, 看彩數
後生的, 就懂得上網看成交, 去估價
老的, 那懂, Agent 說什麼就信什麼嘛

遇不遇上好買家看彩數
但都要遇上好 Agent 肯幫忙 Bargain 啊

(2) 對待 Agent 要客氣

唔該前, 唔該後
麻煩晒, 辛苦晒

不要有錢買樓就串串貢
人家 Agent 都是打份工嘛

現在盤又少
一個盤, 幾個客, 好正常
業主肯減, 賣給誰, 就由 Agent 選擇啦
你客氣點, 禮貌點, Agent 自然第一個想起你
或者有新盤, 可能未公開已經 Call 你了

(3) 睇樓時, 對賣家都要客氣

間屋一日未賣, 還是人家的地頭
想入房睇, 即使只是廚房, 都要先問人
想影相, 即是只影窗外景觀, 也要先問人

留個好印象給賣家
有對比下, 人家可能只願意減 / 賣給你呢

再者, 成交後都可能需要賣家幫忙, 相就
客氣點, 好辦事啊

就好像廁紙
曾經提出要求交吉前上門度尺
賣家都一口答應啊

雖然最終怕打擾賣家而沒有去度
但換來的是, 業主提前搬出, 也就馬上通知 Agent
Agent 也讓我們上去吉屋度尺啊
( 當時還未正式交吉 )

另一點嘛
就是廁紙買的單位
有些文件, 要新舊業主交接

基於某些原因
我們希望業主可以提早交出文件
其實, 業主要是拖延, 我們都吹佢唔漲
但第二天, 業主就交出文件了
你客氣時, 我客氣呢

(4) 遇到不太差的盤, 即管還價

以今時今日的樓市
無可能有 Perfect 盤
就算有, 都不會是你心目中的價錢

你不還價
Agent 只覺得你單睇唔買
有新盤, 都未必再 Call 你啊

(5) 行動証明, 有心買樓

睇樓時, 除了睇屋內
亦記得睇睇垃圾房位置
睇睇廁所天花, 窗邊有無水印

亦記得影影窗外景觀
( 當然要先問問業主啦 )
一來, 方便自己分辨單位
二來, 行動上告訴 Agent, 有心買
無心買的人, 無睇得咁仔細啊

(6) 有時間就盡快去睇樓

用不著每次都一定要 Weekend 先睇樓
有盤, 就盡快睇, 即使一個人都可以先去睇
等到 Weekend, 隨時給人買了
( 廁紙都是星期一晚買的呀 )

(7) 未睇樓, 先估價

估價
一定要由銀行人手估
不要網上估
網上的, 不準確啊

假設一般都是晚上去睇樓, 或者 Weekend 去睇樓
如果先睇樓, 後估價
估價, 最快都要下個工作天嘛
隨時, 就在這個 Non Office Hour, 就給人搶盤了

不估價就還價 / 買嗎
哎...... 後果自負囉
不一定有問題, 但比較高風險吧

Agent Call 你有盤, 通常都不願講正確地址的嘛
最多就說那一座, 那個方向, 低層或者高層

先請 Agent 幫忙估價
自己又推算一個單位去估價
( 自己估一估, 以防有詐 )

只要看看 Floor Plan
單憑 Agent 的幾句, 其實都足以推測是那個單位
不過呢, Agent 說的高層, 中層嘛, 倒不要盡信呢

例如
一座大廈 30 層
15 樓, 已經是 Agent 口中的高層了
6 樓, 又已經是 Agent 口中的中層了
至於低層嘛, 1 樓, 2 樓囉

試過有 Agent 說, 5 - 7 樓
答案就是 5 樓

又試過有 Agent 說, 1, 2 樓啦
答案是地下

保守點推算, 將樓層估低一點
到睇樓時, 如果是比較高層嘛, 再自行將估價上調吧 

睇樓前, 心裡有個估價
睇樓時, 合心水就立即還價啊
否則, 隨時走寶

(8) 親自電聯, 不要 whats app

Agent 找你, 盡量打電話回覆, 不要 whats app
要是繁忙中, 就 whats app 說 " 有時間會打給他 "

試想想, 有幾多次 Agent 不是先來電, 聯絡不上才 whats app
就算 whats app, 還不是叫你 Call Back

不肯電聯嘛, Agent 只覺得你無心買啊
一次打不到, 兩次打不到
第三次, 就算有新盤 / 減價, 都不會第一個就找你了
 
(9) 不要貪小便宜, 向佣金壓價

買樓要知時勢
今時今日, 樓市是由賣家主導

現在買樓, 次序好多時都是
買家先開支票, 先簽臨約
Agent 拿著支票, 臨約, 去找賣家簽

而臨約上
會寫上買賣雙方各自要付的佣金

如果, 賣家見到, 買家佣金比賣家佣金少
你估...... 會點丫嗱

要慳, 都要知時候啊
無謂因小失大

(10) 不要盡信 Agent, 凡事 Clarify

有些時候, 不知是買家無問, 還是 Agent 無特意交代
總之, Agent 所說的, 最好自行 Clarify, 不要盡信

最重要
問清楚業權問題

遺產, 贈契等, 銀行對買家申請按揭都會有不同做法
不到價之餘, 按揭年期又會縮短
甚至, 銀行不接受按揭申請
要小心啊



*          *          *



小分享的原文, 來自廁紙跟同事的 whats app
重新整理, 嘔心瀝血之作

廁紙同事, 都成功上車了
希望這小分享, 都幫到正等待上車的你
有時間, 再分享按揭吧
祝大家都找到安樂窩