還有十個月

2013 年 3 月 1 日, 星期五



還有十個月就大婚
要做的事情不算好多
未做的事情亦不算好多
因為, 好多, 還是未知之數



*          *          *          *          *



自從公告天下
被問得最多的, 就是
" 結婚之後住邊呀 "
廁紙每次都答 " 還有 X 個月時間, 買到就買, 買唔到就租 "
然後, 人家就是一輪買樓理論

雖然, 被問得多, 答得多, 聽得多
有時, 都覺得煩
不過, 依然感激親人, 朋友, 同事, 在買樓方面的分享



*          *          *          *          *



問題二

" 去邊到 Honeymoon 呀 "
我答 " 無, 多數唔去 "
然後呢, 人家總是好驚訝的 " 下? 唔去 Honeymoon...... "

無 Honeymoon 咪無 Honeymoon 囉
點解結完婚就一定要 Honeymoon
點解一定要人有我有
係咪唔去歐洲, 唔去馬爾代夫 Honeymoon, 婚姻就會唔圓滿呢

廁紙草紙每年都起碼去一次旅行
今年, 亦至少去兩次, 甚至飛多轉台北
兩個 Trip, 廁紙草紙都珍而重之
我不覺得我們結婚之後唔 Honeymoon, 即刻返工好失禮
我亦無理由, 聖誕結婚, 明知去旅行好貴都夾硬去啫
只要跟身邊人開心
去不去 Honeymoon, 幾時去
根本, 無所謂



*          *          *          *          *



問題三

" 你咁遲先影相, 會唔會趕唔切呀 "
我答 " 我都無諗住擺相出黎 "

有人覺得
Pre-Wedding, 就為 Big Day 那天俾人睇
有人為了俾人好好睇睇, 影完一次又一次, 影到覺得滿意為止

我不否認, 大部分新娘都想有輯靚靚 Pre-Wedding
我自己, 都不例外
但是, 靚, 唔靚, 每個人的看法都不同
自己覺得靚, 人家可能不屑
絕對無必要為了俾人好好睇睇而影
要影, 都應該是為自己喜歡而影

有朋友話
" 唔係為左 Big Day 俾人睇, 影黎做咩呀, 唔通自己日日睇咩 "
" 有幅油畫擺下靚 D 喎 "

你問我
幾萬元影回來的相簿, 我就捨不得放出來任人掀來掀去啦
人家的婚禮上, 可曾見每個賓客都小心翼翼的去看呢
大大力, 甚至吃完小食未抹手就去掀的, 我可見不少囉
作為一個完美主義者的我, 真的不捨得放相簿出來
Soft Copy, 已經足夠

至於油畫嘛
打從知道 Pre-Wedding Package 不包油畫
我都曾經耿耿於懷
甚至有想過, 自己出去印一幅
( 人有我有的心態 )

後來再想想
酒店都有 Electronic Board
亦不是同層有幾個婚宴, 要以油畫識別
更加不想到時要搬來搬去
油畫, 其實我無需要喎

如果, 真的希望 Reception Table 有點點相的話
一個 A4 Size 的大相架, 內藏幾張細相, 其實更可愛
( 我們甚至覺得, 我們多年來的旅行照, 比婚照還有意思 )
婚後拿回家, 亦可以當個小擺切
到有一天, 看膩了, 還可以換張相

最重要是
廁紙草紙都自知, 不會在新居掛上油畫
( 自從睇樓時見識過人家幾年前的結婚油畫, 配上現代簡約的裝修, 我就怕怕了 )
所以即使我們免費擁有, 大婚日後, 還要找地方安放
煩



*          *          *          *          *



今天, 說東說西, 又說到了結婚
同事關心的說 " 你依家都好多野攪啦 "
我答 " 無呀, 我好多野都唔想整丫嘛 "
同事 " 咁又係, 攪幾多, 做幾多, 視乎你自己啫 "
" 阿 XX, 整呢整路, 張帖係整到好靚, 但人地收到, 睇完個地步就掉架啦 "
一男同事答咀 " 我轉頭就掉左啦 "
" 阿 YY, 用左兩年時間去籌備, 到最後, 佢成日喊, 做唔晒喎 "
廁紙聽到這裡, 心痛那位愛哭的同事
更慶幸, 我只是用一年時間去籌備

籌備初期
廁紙都哭過, 哭過, 再哭過
亦浮現過無數次 " 都係唔嫁 " 的念頭
可幸, 這段哭的日子, 好像只維持了個多兩個月
我真的慶幸, 我只得一年時間去折磨自己
 
打從決定結婚
到訂了 Lunch Buffet
我都希望, 我有一個 Simple Wedding

不要換好多套衫
( 現在只是出門一件褂, 註冊一件婚紗, Buffet 一件晚裝 )
不要油畫
不要 Photo Corner
不要 Deco
不要 Candy Corner

甚至有想過
不要 Backdrop
不要 Reception
不要嘉賓提名
不要印請帖

上頭, 出門, 入門, 註冊, Buffet, 都在同一酒店進行
如果, 我要這個, 又要那個
大婚前的一天, 我要搬幾多東西過去
大婚日的一天, 我又要搬幾多東西回去

有同事說 " 又不是你搬, 男人做的嘛, 你監工啫 "
我答 " 我不想辛苦他, 亦不想辛苦其他人 "
何況, 事前我要準備搬運清單
我也擔心, 搬運過程的損耗, 或者遺漏

酒店的 Poolside 場地, 本來就已經好靚
加 Deco, 加 Backdrop, 反而有點怪
至少, 不是我杯茶
我是因為喜歡泳池而 Book 的嘛
影相, 在池邊影都可以呀
雖然酒店送淨布的 Backdrop
但如果要我加錢做名牌, 還是再考慮考慮吧

至於 Reception 嘛
廁紙草紙只打算請 60 人, 又只打算請親戚, 再加幾個密友
Reception, 有需要嗎
好兄弟認為, 有需要
因為, 長輩可能介意喎

OK, OK
反正酒店會提供椅桌
我就請位姊妹去坐坐吧
但是什麼人情盒, 禮金盒
我是絕對絕對抗拒的

廁紙參加人家的婚禮
最討厭就是入門口就交人情
我是來恭喜主人家呀
怎麼禮物不是親手送, 而是交入場劵的隨便交給一個不認識的人

有人說, 新人忙影相, 無手收嘛
大婚那天, 忙, 的確是忙
但如果, 忙至連禮都不能親手收的話
到底, 又有幾尊重賓客呢
 
時間, 是新人自己控制的
如果, 時間只是用在換衫換衫再換衫
以至連同賓客交流溝通的時間都無
到底, 請飲, 是為了請人來自費看 Show, 還是請人來分享你結婚的喜悅呢

廁紙亦有想過, 印個 Signature Tree
但是, 嘉賓提名, 真的有需要嗎
如果只為到場人士作個紀錄
影張相, 回給人, 不是更好嗎
重點是, 大婚以後, 那張傳統的嘉賓提名, 或者那棵新潮的 Signature Tree
我, 又有幾可回味
倒不如, 好好享受跟賓客一起的時間
回憶在心中

以上只是個人意見, 不喜勿插



*          *          *          *          *



婚禮, 只是那一天的事
結婚, 才是一世人的事

由始至終
我都希望
籌備之時, 開開心心
大婚當日, 輕鬆愉快
沒必要為那一日, 就先先弄得自己不開心
最重要, 身邊人跟自己在一起
其他的, 已經不重要