待溝

2010 年 10 月 26 日

廁紙放工去銅鑼灣, 順道等草紙放工一齊食飯

草紙提議去清亭, 好丫, 我最中意食越南菜

當年, 廁紙第一次去清亭, 都係草紙帶我去

當時, 我地仲未開始

清亭, 一試難忘, 我最中意佢的牛油雞翼

隨後, 每次我想去清亭

草紙都唔太願意, 理由係, 坐得好迫, 好辛苦喎

仲話, 如果真係想食清亭, 不如去機場 T2

同一個名, 但係 T2 清亭的質素差好多嘛

 

星期二晚上的清亭, 好冷清

餐廳依舊將客人集中在一小區

雖然, 各自有自己的二人座, 唔洗搭枱

不過, 枱與枱之間的距離少得同搭枱無分別

廁紙草紙的一邊, 坐了兩個女生

另一邊, 先坐了一個男生, 好一陣子後, 來了一個女生

 

一餐短短的晚餐, 廁紙一反常態, 一句說話都無講過

草紙, 只講了幾次, 好熱, 無冷氣

其他時間, 原來, 大家都豎起耳仔聽呢一男一女的對話

 

草紙話, 從佢地的對話, 聽得出

呢個男生來自中環

草紙話, 從佢地的對話, 聽得出

呢對男女, 有好大的代溝

廁紙心諗, 佢地又講 iphone, 又講食野, 講唔停口, 野都唔食, 點會有代溝呀

幾秒後 ( 今次快左啦 ), 明白, 待溝, 好大的待溝

 

佢地的對話, 似曾相識

一開始, 女生先講自己岩岩去完馬來西亞潛水

男生知道潛水呢個話題係自己的弱項

輕輕一句 " 潛水係一項昂貴同專業的活動 ", 就拎左個 iphone 4 出黎

拎個電話出黎轉話題, 想當年, 有人都用過

不過, 當年人地拎出黎嘅係 Nokia 6300 

岩嘅, 電話呢個話題, 一定唔會 Dead Air

女生亦拎出佢的 iphone 4, 同男生講, 我都諗過買你呢個 Bumper......

男生話, 呢個 Bumper 可以保護部機唔會整花, 第時 Trade 都會高價 D, 要為將來諗

好一句 " 為將來 "

講 Trade 機, 男生又讚女生 Trade 機叻, 讚到佢天上有, 地下無

仲話, 下次 Trade 機都搵女生幫手, Trade 多左嘅錢用黎請女生食飯好過喎

想乘機搵藉口有下次之嘛  

 

到叫野食, 呢個情景, 亦似曾相識

男生推介牛油雞翼

男生話, 每次唔開心, 就想食好野, 但又唔可能下下食貴野喎

又平又好味的, 就會黎食呢到最出名的牛油雞翼, 仲有南記, 食完心情就會好返晒

" 食完心情就會好返晒 " 呢句通常都係女仔講架嘛

男人, 為追女, 真係咩都講得出口, 仲要講到七情上面

結果, 兩個人, 一碗粉, 三碟小食, 講多過食

草紙話, 呢個係策略黎架

首先, 女生比較細食, 所以男生要就女生

第二, 兩個人, 一碗粉, 點都 Sweet 過一人一碗粉

第三, 點小食, 食唔飽架嘛, 同埋一路食一路講野, D 野凍晒你就唔想食架啦

食唔飽, 咁咪有下場可以去食糖水囉 

草紙仲話, 食糖水, 都有注意事項架

要去食熱的糖水, 涼涼秋風食熱糖水, Warm 好多喎

唔怪得, 當年人地帶我去清亭都食唔飽啦

不過, 當年我破壞左某人的計劃, 堅持要去食似許留山的糖水

結果, 有人打電話求救下, 帶左我去 Times Square 食滿記

雖然, 無咁 Warm

不過, 講到尾, 你都係想對我耐 D 啫

 

廁紙問草紙, 男生三番四次咁明示暗示

既然有意, 點解唔去一間環境氣氛都好 D 嘅餐廳呢

清亭 D 枱密到隔離枱都聽到晒你地講咩 

草紙話, 去清亭都係策略之一

如果, 隔離枱坐的係兩個女生, 就可以抬高眼前的一個

你有仔約, 人地無, 要女同女食飯喳

如果, 隔離枱坐的係一男一女, 咁咪等個男的學下野囉

唔怪得, 當年人地都帶我去清亭啦

唔怪得, 得手之後, 人地就唔肯再去清亭啦

 

草紙話, 呢個仔用的招式, 我都係你身上用過晒啦

不過佢地比較幸福, 係新舖的清亭

想當年在舊舖, 坐得半邊 C 忽, 坐到 C 眼痛, 好大犧牲架

 

草紙仲話, 如果我飛左佢, 下個仔要追我都應該幾難

因為, 我已經試過呢 D 追女招數喎

 

幸福生活原是平淡過, 難得朝夕都有你深愛我

唔知幾時, 又會遇到 D 似曾相識的情景呢